ജിദ്ദ

ചെങ്കടലിന്റെ മണവാട്ടിയായ ജിദ്ദ, ചരിത്രത്തിന്റെ വശ്യതയും ആധുനിക കാലത്തിന്റെ പരിഷ്‌കൃത ഭംഗിയും സമന്വയിക്കുന്ന, ഒരിക്കലും ഉറങ്ങാത്ത നഗരമാണ്. ജിദ്ദയുടെ ചരിത്രപ്രസിദ്ധമായ പ്രദേശമായ അൽ-ബലദിലൂടെ ഒരു പര്യടനം നടത്തി, നസീഫ് ഹൗസ് പോലുള്ള പരമ്പരാഗത ഹിജാസി ഭവനങ്ങൾ കണ്ടെത്തൂ. തുടർന്ന് അൽ-അലവി മാർക്കറ്റിലും ജിദ്ദയിലെ മത്സ്യച്ചന്തയിലും തനത് രുചികൾ ആസ്വദിക്കൂ. തീരത്തോടു ചേർന്ന് നീണ്ടുകിടക്കുന്ന ജിദ്ദ കോർണിഷ് സന്ദർശിക്കാൻ മറക്കരുത്. ലോകത്തിലെ ഏറ്റവും ഉയരമുള്ള ജലധാരയായ കിങ് ഫഹദ് ഫൗണ്ടനും ഹരിത ഇടങ്ങളും കുടുംബസൗഹൃദ വിനോദസൗകര്യങ്ങളും ഇവിടെയുണ്ട്.

അൽ തയ്ബാത്ത് മ്യൂസിയം സന്ദർശിക്കുക, റെഡ് സീ മാളിൽ ഷോപ്പിംഗ് നടത്തുക, ഒബ്ഹുറിലെ കടൽത്തീരങ്ങളിൽ നീന്തുക, അല്ലെങ്കിൽ ഡൈവിംഗ് നടത്തി പവിഴപ്പുറ്റുകൾ പര്യവേക്ഷണം ചെയ്യുന്ന സാഹസികയാത്രയ്ക്ക് പുറപ്പെടുക എന്നിവ അവിസ്മരണീയമായ അനുഭവങ്ങളിൽ ചിലതാണ്. കലാ-സാംസ്കാരിക പ്രേമികൾക്ക് ജിദ്ദ ആർട്ട് പ്രൊമെനേഡിലൂടെ ഉലാത്തുകയോ ജിദ്ദ സീസണിൽ ലോകോത്തര പ്രകടനങ്ങൾ ആസ്വദിക്കുകയോ ചെയ്യാം.